على شط العدم - شعر عامي

على شط العدم

شعر عامي

مصطفى الشيمي


لوحة للرائع Adrian Borda


أنا مش عروسة ماريونت
ولا سيف خشب
في إيدين صبي
يحلم في ساعة مغربية
بالمعارك والصبية
يسرح يضيع جوه الخيال
ده أنا ألف شارع في المحال
سكة سفر
فوق احتمال كل البشر
في احتمال الموت .. قدر


والليل؟
الليل على أبواب المدينة
واقف وماسك سوط ظلام
والبوم؟
البوم على أغصان الشجر
والشمس بتحب القمر
لكن ..
حكمت نواميس الطبيعة بالفراق


عارفة؟
أصل الحكاية من زمان
البحر كان أرض ومكان
والعوم طريق المغلوبين
على أمرهم
والعارفين قادرين
مش معجزة
أما أنتَ..
لا عرفت تغرق زيهم
ما حتى وصلت للمعنى

تعليقات

المشاركات الشائعة